Komisioneri Shtetëror i Zgjedhjeve, Iliran Celibashi miratoi të martën raportin mbi gjetjet nga auditimi i raporteve financiare të partive politike, duke vendosur 108 gjoba gjithsej për moszbatim të dispozitave ligjore për transparencën financiare.

Për shkelje të dispozitave për financimin e partive politike, Celibashi vendosi sanksionin administrativ në masën 60 000 lekë për 94 partitë politike, ndërsa për shkelje të detyrimit për të raportuar u gjobitën 14 parti me 1 000 000 lekë secila.

Me shkelje në raportim dhe me pagesa cash të pajustifikuara janë gjetur dhe 3 parti parlamentare, Partia Socialiste, Partia Demokratike dhe Partia Social Demokrate, të cilat u gjobitën nga 60 mijë lekë.

Partia në pushtet është gjetur në shkelje pasi nuk ka raportuar të ndara shpenzimet e fushatës elektorale për zgjedhjet e pjessshme vendore të marsit 2022 dhe se ka bërë pagesa në të zezë, duke shmangur detyrimet tatimore.

“Pagesat e kryera për shpërblimin e fundvitit si dhe pagesat për punë shtesë nga disa punonjës të saj, nuk janë përfshirë në listë pagesat e raportuara në organet fiskale,” konstaton auditimi i PS-së.

Po ashtu, sipas auditit, PS nuk ka paraqitur në raport llogarinë për amortizim e ndërtesës që e ka me qera nga shteti.

Me parregullsi është gjetur dhe raportimi i Partisë Demokratike, për mosndarjen e shpenzimeve të fushatës nga raportimi vjetor. “Në pasqyrat financiare partia nuk ka paraqitur të ardhura dhe shpenzime për degët e saj, nisur nga fakti se viti 2022 ka pasur zgjedhje të pjesshme. Në pasqyrat financiare nuk janë paraqitur të ardhurat dhe shpenzimet e kandidatëve,” thuhet në raport.

Ndërsa Partia Socialdemokrate e Tom Doshit, aleate me PS-në, ka parregullsi në likuidimet e pagave, të honorareve dhe ndihmave të cilat gjithashtu janë bërë në të zezë, mungesa në llogaritjen e tatimit në burim për këto pagesa, mungesë faturash për qiranë e selisë dhe blerje që nuk mbështeten me fatura tatimore elektronike.

E vetmja parti parlamentare që nuk është gjetur me probleme është ish- Lëvizja Socialiste për Integrim ( aktualisht Partia e Lirisë), e cila i ka shpëtuar sanksioneve.

Raporti evidenton se nga 131 parti politike të regjistruara në gjykatë, vetëm 48 parti i kanë dorëzuar në kohë raportet financiare.

Sipas KQZ-së, për 76 parti nuk u krye auditimi për shkak të adresave jo të sakta, 7 parti të tjera refuzuan të bashkëpunonin me audituesit ligjorë dhe 4 parti janë shpallur në listën e subjekteve me statusin pasiv nga organet tatimore.

Transparenca e financimeve të partive politike vijon të jetë një shqetësim, ndërsa KQZ i ka kërkuar Kuvendit mekanizma ligjorë që ky institucion të kontrollojë këto financime, sidomos rastet e përdorimit të aseteve publike në fushatë.

Burimi informacionit @BalkanWeb: Lexo me shume ne : Bota Sot News botasot.co