Jehonë e madhe botërore është bërë për ndeshjen mes Rumanisë dhe Kosovës. Përpara nisjes së këtij takimi, Federata Rumune e Futbollit i bëri thirrje tifozëve që të përmbanin veten pasi rrezikohej humbja 3-0 në tavolinë në rast të një degradimi të situatës. Në Rumani e dini mjaft mirë se UEFA do të ishte me një sy nga kjo ndeshje pasi pritej që të kishte një zhvillim të situatës.

Deri në minutën e 90 të takimit, me disa reagime të pritshme, situata ishte deri diku brenda kontrollit. Në minutat shtesë do të shpërthente gjithçka pas një kontakti fizik mes Rrahmanit dhe Abilec. Tifozët rumunë nisën me thirrjet se Kosova është pjesë e Serbisë, ndërsa Rrahmani i kërkoi lojtarëve të Kosovës që tërhiqeshin në dhomat e zhveshjes.

Përkundër thirrjeve nga zyrtarët e UEFA-s për të vazhduar ndeshjen, Kosova nuk pranoi që të luante deri në fund. Kështu u mbyll ky takim, ndërsa sa i përket deri në minutën e 93 ishte 0-0. Por si është pasqyruar e gjitha kjo ngjarje në mediat botërore?

Në pjesën dërrmuese të tyre, thuhej se Kosova e la fushën e lojës pas thirrjeve raciste të rumunëve kundër shqiptarëve. Në një pjesë më të vogël të mediave pro serbe, arrijnë deri aty sa të shpikin historinë se situata kaloi në nivel tjetër pas një faulli që te Kosova nuk po e pranonin.

Për të kaluar te gazetari anglez Sam Street, që la të nënkuptuar se dardanët nuk dolën nga fusha për të mbajtur dinjitetin apo krenarinë, por se gjithçka ishte pjesë e një plani për të dalë në vendin e parë në grup.

“Kosova kërkonte një fitore 3-0 ndaj Rumanisë për të mbajtur hapur shpresat për vendin e parë. Me ndeshjen që ishte 0-0 në minutën e 90, lojtarët e Kosovës dolën nga fusha dhe refuzonin të luanin. Nëse rezulton faji i Rumanisë, Kosova fiton…3-0”. Ky mendim i gazetarit anglez ka marrë jehonë të madhe edhe në mediat e Serbisë, të cilat thonë se është zbuluar plani djallëzor i Kosovës në tokën rumune.

Por për çfarë bëhet fjalë?  Ndeshja e fundit e Rumanisë është në shtëpi kundër Qipros, atje ku fitorja është e sigurt ende pa luajtur. Pasi Rumania fitoi 0-3 ndaj Kosovës në transfertë, në ndeshjen e parë, Kosova kërkonte minimalisht një fitore 0-3 në Rumani për ta lënë gjithçka të hapur për ndeshjen e fundit.

Atje vendi i parë do të vendosej nga ekipi që do të fitonte me më shumë goleadë në ndeshjen e fundit, por sërish Rumania është në avantazh. Ndërkohë në rast se Kosova fitonte në shifrat minimale apo barazonte ndaj Rumanisë, atëherë do të ishte e dalë nga gara. Për këtë arsye, gazetari anglez lë të nënkuptohet se përveç krenarisë dhe dinjitetit, te Kosova ka pasur edhe llogari në vendimin e marrë. Në këtë linjë mendimi ishin edhe portieri i Rumanisë me trajnerin e Rumanisë, Lusecku. Ky i fundit u shpreh se vendimi i Kosovës ishte një plan i menduar që përpara ndeshjes, i cili do të zbatohej vetëm nëse ndeshja nuk do të shkonte mirë. /Sport Ekspres/

Burimi informacionit @Gazeta Sport Ekspres: Lexo me shume ne : Gazeta Sport News gazeta sport news