Manchester United ka shkarkuar trajnerin Erik ten Hag pas humbjes 2-1 të së dielës ndaj West Ham, ku klubi regjistroi një nga fillimet më të këqija në një sezon në Premier League.
Holandezi u informua këtë të hënë mbi vendimin për të, duke u larguar nga Old Trafford pas dy vite e gjysmë në krye.
Sipas Sky News, Ruud van Nistelrooy, ish-sulmuesi holandez i cili ishte ndihmës trajner, do të marrë drejtimin e skuadrës si trajner i përkohshëm derisa të rekrutohet një trajner i përhershëm.
United ka vetëm një fitore nga pesë ndeshjet e fundit të ligës së parë dhe është në vendin e 14-të në divizion, shtatë pikë mbi zonën e rënies pasi ka shënuar vetëm tetë gola në nëntë ndeshje të ligës.
Erik u emërua në prill 2022 dhe e udhëhoqi klubin drejt dy trofeve vendas, duke fituar Kupën Carabao në 2023 dhe FA Cup në 2024.
Ten Hag vijoi kontratën si trajner i United në verë edhe pas renditjes në vendin e tetë në Premier League, më i ulëti i klubit që nga viti 1990, dhe një fitore në finalen e Kupës FA ndaj rivalëve Manchester City.
United aktivizoi një opsion zgjatjeje për një vit në kontratën e 54-vjeçarit në fillim të korrikut. Marrëveshja e tij e mëparshme, të cilën ai e nënshkroi kur u emërua në vitin 2022, do të skadonte në 2025.
Megjithatë, një formë tjetër jashtëzakonisht zhgënjyese për të filluar sezonin e ri ka nxitur vendimmarrësit kryesorë, duke përfshirë shefin ekzekutiv Omar Berrada, drejtorin sportiv Dan Ashworth dhe drejtorin teknik Jason Wilcox, të bëjnë ndryshime.
