Goli për të cilin do të flasin për shumë vite në Londrën Lindore dhe që do të zërë vendin e tij në historinë e pasur të Lejton Orientit nuk është fituesi i shënuar nga Kevin de Bryjne.

Dhe nuk u shënua as nga ndonjë lojtar i Orientit. Është autogoli i Stefan Ortegës në pjesën e parë, pasi një goditje e mrekullueshme nga 50-metra e Xhemi Donlejt, e cila u përplas në traversë, goditi portierin e Mançester Sitit teksa ai po kthehej në portë i panikosur dhe përfundoi në rrjetë. Ky ishte goli që ndezi një tjetër fundjavë të Kupës FA dhe që i dërgoi në festë në ballkonet e banesave me pamje nga “Brisbane Road”, që këto ditë do të marrë emrin “Stadiumi i Grupit Gaughan”.

Ai gjithashtu frymëzoi Riçi Uellensin dhe ekipin e tij të Ligës së Parë që të besonin se mund të ishin në rrugën e duhur për të bërë një mrekulli ndaj ekipit kampion të Anglisë, që është kthyer tashmë në një objektiv më i lehtë për t’u sulmuar. Orienti kryesoi në pjesën e parë dhe po barazonte deri në minutën e 79-të, kohë në të cilën Guardiola ishte detyruar të thërriste De Bryjnen dhe Fill Fodenin nga stoli dhe kishte në fushë pak a shumë ekipin e tij të parë. Një debutim për t’u harruar për Niko Gonzalezin, mesfushorin që erdhi nga Porto për të zëvendësuar Rodrin. 23-vjeçari doli i dëmtuar në mesin e pjesës së parë, ndërsa iu rrëmbye edhe topi në mesfushë në aksionin e golit të parë të vendësve.

Goli i rivalëve entuziazmoi edhe vetë Guardiolën, i cili tha: “Çfarë goli! Kur pëson një gol të tillë, nuk të mbetet gjë tjetër veçse ta urosh atë djalë. Ai është një futbollist mëngjarash i pabesueshëm dhe shënoi një gol fantastik. Pozicioni ynë është pak i paqendrueshëm, prandaj këto rezultate më bëjnë kaq të lumtur dhe krenar”. Për Sitin erdhi edhe goli i parë i Khusanovit, qendërmbrojtësit të transferuar vetëm muajin e shkuar në “Etihad”, i cili u aktivizua në pjesën e dytë. “Kur të këndojnë ‘do shkarkohesh në mëngjes’, është kthyer në një rutinë në të gjitha stadiumet tani. Por unë jam shumë i sigurt se presidenti im nuk do të më shkarkojë tani. Ne e dimë sesa fort luajnë ekipet e ligave të ulëta në këtë kompeticion dhe mua më pëlqen të luaj kundër tyre. Është shumë argëtuese”, shtoi katalanasi, i cili sot do të mësojë edhe emrin e kundërshtarit të 1/8-ave në rrugën drejt finales së tretë radhazi të Kupës FA.

ANDROKLI DRALO-PANORAMASPORT.AL