Ndeshja mes Holandës dhe Hungarisë në Ligën e Kombeve këtë të shtunë bëri që të kalonte në plan të dytë futbolli pas asaj që i ndodhi Adam Szalait që në minutat e parë. Ish-sulmuesi legjendar i Hungarisë, tashmë zëvendëstrajner i përfaqësueses, pësoi një infarkt në pankinë duke bërë që për disa momente të mendohej më e keqja.

Ndërhyrja e shpejtë e mjekëve të cilët i bënë një masazh kardiak që e ktheu përsëri në jetë, solli edhe përmirësimin e situatës së Szalait, i cili u dërgua në spital për vizita të mëtejshme. Gjatë natës ai vetë postoi në rrjetet sociale një mesazh për të qetësuar tifozët, ndërsa është zbuluar se gjendja e tij tashmë është normalizuar plotësisht.

Mediat hungareze kanë bërë të ditur se jo vetëm Szalai është lejuar që të largohet nga spitali për të shkuar në hotelin e përfaqësueses, por edhe të udhëtojë me të drejt Hungarisë ku ajo luan të martën ndeshjen e radhës. Megjithatë, kjo është bërë e mundur vetëm falë faktit se stafi i Hungarisë ka garantuar një monitorim të vazhdueshëm të ish-sulmuesit, i cili pritet t’i nënshtrohet testeve më të hollësishme në vendlindje për të shmangur ngjarje të ngjashme në të ardhmen.

PANORAMASPORT.AL