Një artikull i prestigjiozes britanike, “The Telegraph”, ka zbuluar se Mbretëria e Bashkuar ka ndihmuar në hapjen e një burgu të ri me miliona paund në Shqipëri.
Oficerët e burgjeve në Mbretërinë e Bashkuar kanë punuar me homologët e tyre shqiptarë për të hapur burgun e parë në vend pas një marrëveshjeje për transferimin e të burgosurve, dhe financimin me 4 milionë paund në vit.
“The Telegraph” shkruan se Britania po i paguan Shqipërisë paratë për të rikthyer 200 të burgosurit e saj më të rrezikshëm, si dhe po financon trajnimin e oficerëve të burgjeve, rinovimin e burgjeve, sigurinë shtesë, punëtoritë dhe pajisjet e rehabilitimit.
Mbretëria e Bashkuar ka paguar gjithashtu për një flotë prej 1.5 milion £ me 15 makina elektrike dhe 22 mikrobusë për të ndihmuar në përmirësimin e shërbimit të burgjeve në Shqipëri.
Siç thuhet në artikull, mësohet se janë rreth 1,270 shqiptarë të mbajtur në burgje në Angli dhe Uells, numri më i madh nga çdo kombësi dhe që përbën gati një në shtatë nga 10,500 të burgosur të huaj.
“10,500 të burgosurit e huaj po zënë një në nëntë vende në burgje me një kosto prej 52,000 £ për person, ose gati 550 milion £, kjo është arsyeja pse ministrat po përpiqen të gjejnë mënyra për t’i riatdhesuar në vendet e tyre”, shkruan The Telegraph.
Burgu i ri për të riatdhesuarit ndodhet në Tiranë, në zonën e Ali Demit, i cili fillimisht ishte një burg grash, ndërsa tani do të ketë hapësirë për 25 të burgosur meshkuj.
Sipas marrëveshjes dyvjeçare, të dënuarit që vuajnë dënime me më shumë se katër vjet, do përfundojnë burgimin në Shqipëri me një kosto prej 32 £ në ditë, krahasuar me 109 £ në ditë në MB.
Të 200 të burgosurit përfshijnë vrasës, përdhunues dhe tregtarë droge, të cilët do të transferohen në grupe, do të vuajnë të njëjtën kohë dënimi siç do të kishin në MB.
Do të ketë një grup të përbashkët mbikëqyrës për të parandaluar keqtrajtimin e të burgosurve me qeverinë shqiptare që do të përgatisë një raport vjetor për të burgosurit dhe kushtet e tyre, dhe Qeveria e Mbretërisë së Bashkuar do të ruajë të drejtën për të kryer kontrolle fizike.
Në mesin e 200 të transferuarve janë 17 të burgosur të përjetshëm, përfshirë Koci Selamaj, vrasësi i mësueses Sabina Nessa, e cila u burgos për të paktën 36 vjet për rrahjen dhe mbytjen e saj për vdekje në një park në juglindje të Londrës.
Ai ka vuajtur deri më tani vetëm dy vjet, që do të thotë që Britania e Madhe do t’i paguajë shqiptarët 400,000 £ për ta burgosur për 34 vitet e mbetura të dënimit të tij. Do të kushtonte më shumë se 2 milionë paund nëse ai do të qëndronte në Britaninë e Madhe.
