Në Lituani ka nisur ndërtimi i një baze ushtarake për një brigadë gjermane në bazën e stërvitjes Rudninkai.

Pas pushtimit rus të Ukrainës në vitin 2022, Vilnius dhe Berlini ranë dakord për vendosjen e përhershme të një brigade gjermane në Lituani.

“Është një nga përpjekjet më të rëndësishme që forcat e armatosura gjermane po ndërmarrin aktualisht,” tha Sekretari i Shtetit në Ministrinë Federale të Mbrojtjes të Gjermanisë, Nils Hilmer.

Lituania ka premtuar të ndërtojë kampin, duke përfshirë infrastrukturën për një qytet të ri ushtarak, i cili do të mbulojë 200 hektarë tokë. Ndërtesat që do të ngrihen përfshijnë godinat e administratës, infrastrukturën e mirëmbajtjes dhe ruajtjes, një godinë roje dhe konvikte banimi.

Berlini synon të mbajë një brigadë ushtarake të stacionuar plotësisht në Lituani deri në vitin 2027.

Zyrtarët gjermanë kanë thënë se ritmi i zhvendosjes do të varet nga gatishmëria e Lituanisë për të pritur ushtarë dhe familjet e tyre.

Brigada pritet të përbëhet nga rreth 5000 ushtarë. Deri më tani, Lituania vlerësoi se një e treta e tyre do të vijnë me familjet e tyre.

Investimet në ushtri dhe trajnime në lidhje me vendosjen e brigadës mund të arrijnë në 800 milionë euro, sipas Ministrisë së Mbrojtjes Kombëtare të Lituanisë.

“Kjo shënon një ndryshim në procesin e planifikimit të NATO-s,” tha ministri lituanez i Mbrojtjes Laurynas Kasčiūnas.

Burimi informacionit @BalkanWeb: Lexo me shume ne : Bota Sot News botasot.co