Muhamed Sejdini nuk do të jetë më presidenti i Federatës së Futbollit të Maqedonisë së Veriut. Ai ka dhënë dorëheqjen nga posti i tij drejtues në futbollin maqedonas, të cilin do ta mbajë deri më 22 dhjetor. Lajmin e ka bërë të ditur vetë Sejdini. Ky i fundit ka njoftuar vendimin e tij në llogarinë e tij zyrtare në “Facebook”. Gjatë drejtimit 7-vjeçar të Sejdinit, Maqedonia siguroi për herë të parë kualifikimin në një Europian, shkoi në “play off” për Kupën e Botës dhe siguroi ngjitjen në Ligën B të Ligës së Kombeve.

“Pas 7 viteve të jashtëzakonshme dhe të mbushura me arritje historike, kam vendosur të tërhiqem nga pozita e Presidentit të Federatës së Futbollit të Maqedonisë. Ky vendim vjen si rezultat i reflektimit tim për një moment të përshtatshëm ndryshimi, pas një periudhe që do të mbetet si më e suksesshmja në historinë e futbollit tonë.

Nën drejtimin tim, së bashku me ju, kemi shkruar kapituj të artë për futbollin e Maqedonisë: kualifikimi historik në Kampionatin Europian EURO 2020, renditja e dytë në grupin kualifikues për Kupën e Botës dhe fitorja e paharrueshme kundër Italisë në Palermo, sukseset e Ligës së Kombeve me kalimin në Ligën B dhe realizimi i projekteve të shumta infrastrukturore në bashkëpunim me UEFA-n dhe FIFA-n.

E lë këtë pozicion me krenari dhe falënderim të madh për të gjithë ata që kontribuuan në këto arritje: lojtarët, trajnerët, klubet, investitorët, administratën, Komitetin Ekzekutiv dhe çdo dashamirës të futbollit. Unë do të vazhdoj të ushtroj rolin tim deri më 22 dhjetor, kur në një Kuvend të Jashtëzakonshëm do të zgjidhet pasardhësi im. Me besim të plotë në të ardhmen e Federatës dhe të futbollit tonë, ju falënderoj nga zemra për mbështetjen dhe bashkëpunimin ndër vite”, ka njoftuar Muhamed Sejdini./Sport Ekspres/

Burimi informacionit @Gazeta Sport Ekspres: Lexo me shume ne : Gazeta Sport News gazeta sport news