Ministri i jashtëm Igli Hasani ka kërkuar përshpejtimin e procesit të anëtarësimit të Kosovës në Kartën e Adriatikut. Hasani tha se për Shqipërinë, si kryesuese e Kartës së Adriatikut, zbatimi i politikës së dyerve të hapura mbetet prioritet kyç.

Këto qëndrime, kreu i diplomacisë shqiptare i ka mbajtur në mëngjesin e punës të organizuar nga kryesia shqiptare me vendet anëtare të Kartës SHBA-Adriatik (A-5), ku theksoi se Shqipëria mbetet e vendosur me vendosmëri për të promovuar paqen dhe stabilitetin, nxitjen e dialogut dhe rritjen e bashkëpunimit në Ballkanin Perëndimor.

“Ne qëndrojmë gjithashtu si avokatë të fortë për integrimin evropian dhe euroatlantik të Ballkanit Perëndimor”, tha ministri Hasani.

Në vijim ai u shpreh se “një përgjigje pozitive ndaj kërkesës së kahershme të Kosovës për anëtarësim është një hap vendimtar dhe i vonuar që duhet të zgjidhet sa më shpejt që të jetë e mundur”.

Në takim morën pjesë vendet anëtare dhe vëzhguese të Kartës SHBA-Adriatike, Shqipëria,  Bosnje-Hercegovina, Kroacia, Mali i Zi, Maqedonia e Veriut, SHBA-të, Kosova (vëzhgues), Serbia (vëzhgues) dhe Sllovenia (e ftuar).

Në mëngjesin e punës të organizuar përgjatë javës së Nivelit të Lartë të OKB-së, u vlerësua fokusi i Shqipërisë në kryesimin e nismës dhe diskutimet u fokusuan mbi zhvillimet në rajon dhe forcimin e mëtejshëm të bashkëpunimit përballë sfidave të përbashkëta të sigurisë.

Burimi informacionit @BalkanWeb: Lexo me shume ne : Bota Sot News botasot.co