Vladimir Putin ka thënë se një lëvizje perëndimore për të lejuar Kievin të përdorë armë me rreze më të gjatë kundër objektivave brenda Rusisë do të thotë se NATO do të ishte “në luftë” me Moskën.

Putin reagoi teksa diplomatët e lartë të SHBA-së dhe Britanisë së Madhe diskutuan lehtësimin e rregullave për përdorimin e armëve perëndimore në Rusi, për të cilën Kievi ka bërë presion, më shumë se dy vjet e gjysmë pas ofensivës së Moskës.

“Kjo do të ndryshonte në një mënyrë domethënëse vetë natyrën e konfliktit”, i tha Putin një gazetari të televizionit shtetëror.

Ai u shpreh se kjo do të thotë se vendet e NATO-s, SHBA-të, vendet evropiane, janë në luftë me Rusinë.

“Nëse është kështu, atëherë duke marrë parasysh ndryshimin e natyrës së konfliktit, ne do të marrim vendimet e duhura bazuar në kërcënimet me të cilat do të përballemi”, tha Putin.

Komentet e Putinit erdhën një ditë pasi sekretari amerikan i shtetit, Antony Blinken, dha aludimin e tij më të fortë se Shtëpia e Bardhë është gati të heqë kufizimet e saj ndaj Ukrainës duke përdorur armë me rreze të gjatë veprimi të furnizuara nga perëndimi në objektivat kryesore ushtarake brenda Rusisë.

Duke folur në Kiev së bashku me Sekretarin e Jashtëm të Mbretërisë së Bashkuar, David Lammy, Blinken tha se SHBA “që nga dita e parë” ishte e gatshme të përshtaste politikën e saj ndërsa situata në fushën e betejës në Ukrainë ndryshonte. “Ne do të vazhdojmë ta bëjmë këtë”, theksoi ai.

Blinken tha se ai dhe Lammy do t’u raportojnë “shefave” të tyre – Joe Biden dhe Keir Starmer – pas bisedimeve të tyre të mërkurën me presidentin ukrainas, Volodymyr Zelenskiy.

Sekretari i Jashtëm sugjeroi se dërgimi i raketave balistike nga Irani në Moskë – i zbuluar këtë javë – kishte ndryshuar mendimin strategjik në Londër dhe Uashington.

Ishte një “përshkallëzim i rëndësishëm dhe i rrezikshëm”, tha ai.

Ai shtoi: “Shkallëzimi këtu është Putin. Putini e ka përshkallëzuar me dërgesën e raketave nga Irani. Ne shohim një bosht të ri të Rusisë, Iranit dhe Koresë së Veriut”.

Lammy i kërkoi Kinës “të mos e hedhë fatin e saj” me atë që ai e quajti “një grup renegatësh”.

Burimi informacionit @BalkanWeb: Lexo me shume ne : Bota Sot News botasot.co