Sekretari amerikan i Shtetit, Antony Blinken, i ka thënë Sky News se presidenti Joe Biden “nuk e përjashton” mundësinë që Ukraina të gjuajë raketa në territorin rus.

Antony Blinken e bëri komentin pasi tha në një konferencë shtypi në Londër, se Irani i kishte ofruar Moskës raketa me rreze të shkurtër veprimi dhe se forcat e Vladimir Putinit “ka gjasa t’i përdorin ato brenda javësh në Ukrainë”.

Presidenti ukrainas Volodymyr Zelensky u ka bërë thirrje Shteteve të Bashkuara dhe aleatëve të tjerë perëndimorë, që të lejojnë Ukrainën të përdorë raketa me rreze të gjatë për të goditur objektivat në Rusi, për të intensifikuar presionin ndaj Moskës për t’i dhënë fund luftës.

Në një intervistë në Sky News, Blinken u pyet nëse presidenti amerikan mund të konsideronte lejimin e një lëvizjeje të tillë ndërsa konflikti vazhdon.

Blinken tha se SHBA ishte siguruar që Ukraina kishte “atë që i duhej, kur i duhej, për të qenë efektive në zmbrapsjen e agresionit rus” që nga fillimi i pushtimit të saj nga Moska në shkurt 2022.

Por ai shtoi se Uashingtonit iu desh të merrte në konsideratë edhe faktorë të tjerë, të tillë si nëse forcat e Ukrainës mund të përdorin “sistemet e sofistikuara” që ofrojnë aleatët perëndimorë dhe nëse ata mund t’i mirëmbajnë ato.

“Të gjitha këto gjëra duhet të përfshihen në këto vendime. Por ajo që mund t’ju them është se ne jemi përshtatur dhe rregulluar çdo hap përgjatë rrugës, dhe ne do të vazhdojmë – kështu që nuk përjashtohet në këtë fazë. Ne kurrë nuk e përjashtojmë. Ne duam të sigurohemi që të bëhet në një mënyrë të tillë që të mund të çojë përpara atë që ukrainasit po përpiqen të arrijnë”, tha Blinken.

Burimi informacionit @BalkanWeb: Lexo me shume ne : Bota Sot News botasot.co