Kryeministri i Indisë, Narendra Modi, do ta vizitojë Ukrainën më 23 gusht, njoftuan të hënën zyrtarët ukrainas.

Zyra e presidentit ukrainas Volodymyr Zelensky konfirmoi një njoftim të mëhershëm të Ministrisë së Jashtme të Indisë për vizitën e Modit dhe njoftoi edhe për datën.

Modi dhe Zelensky do të bisedojnë për bashkëpunimin dypalësh dhe shumëpalësh, si dhe për nënshkrimin e disa dokumenteve, sipas Presidencës ukrainase.

Modi do ta vizitojë Ukrainën një muaj pasi e vizitoi Moskën, ku u takua me presidentin e Rusisë, Vladimir Putin.

Zelensky e kritikoi atë takim, duke thënë më 6 korrik se ishte “zhgënjim i madh dhe goditje e rëndë ndaj përpjekjeve për paqe ta shohësh liderin e demokracisë më të madhe në botë duke e përqafuar kriminelin më të përgjakshëm në botë”

India nuk e ka dënuar pushtimin e Ukrainës nga Rusia, që nisi në shkurt 2022, dhe u ka bërë thirrje Rusisë dhe Ukrainës ta zgjidhin konfliktin përmes dialogut dhe diplomacisë.

Nën udhëheqjen e Modit, India synon t’i forcojë marrëdhëniet me Perëndimin dhe, njëkohësisht, t’i ruajë lidhjet me Rusinë.

India është bërë blerës kyç i naftës ruse pas sanksioneve që Shtetet e Bashkuara dhe aleatët e tyre i vendosën ndaj Moskës, si pasojë e të cilave shumica e tregjeve të Perëndimit u mbyllën për eksportet ruse.

India tani 40 për qind të naftës së importuar e merr nga Rusia, sipas analistëve.

Edhe Shtetet e Bashkuara kanë shprehur shqetësime rreth marrëdhënieve të Indisë me Rusinë , posaçërisht në një kohë kur Uashingtoni po kërkon t’i forcojë lidhjet me Nju Delhin./REL

NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co