Zëvendëspresidentja e Shteteve të Bashkuara, Kamala Harris dhe ish Presidenti Donald Trump shpalosën këtë javë vizionet e tyre për ekonominë e vendit. Kandidatët premtuan se do ta frenojnë inflacionin dhe nuk do të taksojnë bakshishet e kamerierëve. Siç njofton korrespondentja e Zërit të Amerikës, Patsy Widakuswara, ndërsa idetë gëzojnë mbështetjen e votuesve në prag të zgjedhjeve presidenciale të nëntorit, ekspertët thonë se nuk është e lehtë që ato të zbatohen.

Votuesit amerikanë, si republikanët edhe demokratët, pajtohen kur flitet për rritjen e çmimeve.

“Çmimet vazhdojnë të rriten dhe kjo dëmton xhepin tuaj”, thotë James Russell, votues në Virxhinia.

Ndërsa afrojnë zgjedhjet e nëntorit, dy kandidatët, Zëvendëspresidentja Harris dhe ish Presidenti Trump, po përqendrohen tek inflacioni.

“Kur të zgjidhem presidente, objektivi im kryesor do të jetë ulja e kostove dhe rritja e sigurisë ekonomike për të gjithë amerikanët”, thotë kandidatja demokrate për Shtëpinë e Bardhë, Kamala Harris.

“A ndihet dikush këtu më i pasur gjatë qeverisjes së Kamala Harris-it dhe Joe Biden-it sesa gjatë administratës Trump? A janë çmimet më të përballueshme nën Kama Harris dhe Joe Biden”, pyet kandidati republikan për president, Donald Trump.

Me thirrjen që qeveria federale të ndërhyjë për të kontrolluar çmimet, zonja Harris e vuri theksin tek industria e përpunimit të mishit.

Nga ana tjetër, kandidati republikan Donald Trump thotë se do të luftojë rritjen e çmimeve përmes shtimit të prodhimit të naftës dhe gazit.

“Ka shumë pak gjasa që ndonjë politikë e vetme e prezantuar nga një president të ketë ndikim të madh për të ulur inflacionin nga niveli aktual në objektivin afatgjatë të Rezervës Federale për ekonominë, i cili është 2%”, thotë Andrew Lautz me Qendrën e Politikave Dypartiake.

Muajin e kaluar, për herë të parë që nga marsi i vitit 2021, inflacioni në Shtetet e Bashkuara ra në masën 3%, megjithëse amerikanët ende po i vuajnë pasojat. Të dhënat nga shitjet me pakicë janë optimiste, papunësia është e ulët dhe shumica e ekonomistëve nuk paralajmërojnë më për recesion.

Megjithatë, situata ekonomike mbetet shqetësimi kryesor për votuesit amerikanë dhe një pikë e nxehtë debati në fushatat zgjedhore.

“Nuk do ta lëmë këtë socialiste të çmendur të paaftë që të vazhdojë ta shkatërrojë ekonominë tonë për katër vjet të tjera. Kjo do ta shkatërrojë vendin tonë”, thotë kandidati republikan për president, Donald Trump.

“Krahasoni planin tim me atë që synon të bëjë Donald Trumpi. Ai planifikon të ulë ndjeshëm taksat për miliarderët vit pas viti dhe të ulë taksat për korporatat me mbi një trilion dollarë”, thotë kandidatja demokrate për Shtëpinë e Bardhë, Kamala Harris.

Dy rivalët kanë premtuar që të heqin taksat federale për bakshishet e kamerierëve. Kritikët thonë se propozimi nuk i ndihmon punonjësit e industrisë së ushqimit të çastit apo punonjës të tjerë me të ardhura të ulëta që nuk marrin bakshishe. Ata paralajmërojnë se propozimi ka kosto dhe mund të abuzohet.

“Si mund të sigurohemi që përfitojnë ata që e meritojnë? Kjo mund të hap mundësinë për abuzime, ku disa njerëz mund t’i trajtojnë shpërblimet dhe tarifat e punës së mirë si bakshish dhe mos t’i paguajnë taksat”, thotë Steven Rosenthal me Qendrën e Politikave Tatimore.

Para tërheqjes së Presidentit Joe Biden nga gara për Shtëpinë e Bardhë, zoti Trump kryesonte sondazhet për çështjet ekonomike. Tani, të paktën një anketë tregon se dy rivalët pothuajse gëzojnë mbështetje të barabartë, me 42% mbështetje për zonjën Harris dhe 41% mbështetje për zotin Trump.

NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co