Financial Times zbulon planet e supozuara sekrete të Moskës në rast lufte kundër NATO-s: “Aleanca nuk është e përgatitur për të mbrojtur veten”

Rusia do të ishte e gatshme të godiste disa zona në Evropë me raketa me majë bërthamore në rast të një lufte kundër NATO-s. Kjo është ajo që del nga një sërë dokumentesh sekrete të publikuara nga gazeta britanike Financial Times.

Sipas këtyre dokumenteve, Moska ka trajnuar marinën e saj në vitet e fundit për të transportuar armë bërthamore në zonat nga të cilat është e mundur të godasësh objektiva në zemër të kontinentit.

Sipas Financial Times, dokumentet që konsiderohen të besueshme nga një sërë ekspertësh, parashikojnë të paktën 32 vende që do të ishin të parat që do të goditeshin nga sulmet e mundshme raketore ruse në rast lufte. Këto nuk janë vetëm objektiva ushtarake, por edhe civile dhe infrastruktura kritike, dhe janë të përhapura në të gjithë Gjermaninë, Francën, Mbretërinë e Bashkuar dhe Norvegjinë, duke përfshirë bazën detare të Bergenit.

Në planet e tyre, që mbulojnë periudhën 2008-2014, zyrtarët rusë theksojnë se “manovrimi i lartë” i marinës së tyre e lejon atë të kryejë “sulme të papritura dhe parandaluese” dhe “sulme masive raketore… nga drejtime të ndryshme”. Ata shtojnë se armët bërthamore janë “normalisht” të përcaktuara për t’u përdorur “në kombinim me mjete të tjera të shkatërrimit” për të arritur objektivat e Rusisë.

Analistët që shqyrtuan dokumentet në emër të Financial Times besojnë se këto plane janë ende aktuale dhe në përputhje me vlerësimet e bëra nga ekspertët e NATO-s muajt e fundit, veçanërisht në lidhje me përdorimin e armëve bërthamore.

Dokumentet “tregojnë gjithashtu se Rusia ka ruajtur aftësinë për të mbajtur armë bërthamore në anijet sipërfaqësore, aftësi e cila, sipas ekspertëve, mbart rreziqe shtesë të konsiderueshme përshkallëzimi apo aksidentesh”, shkruan gazeta britanike. Në thelb, vitet e fundit Moska ka transportuar raketa me kokë bërthamore jo shumë larg brigjeve evropiane, një transport që konsiderohet shumë i rrezikshëm edhe në kohë paqeje, duke pasur parasysh rrezikun e lartë të aksidenteve.

Zbulimet e Financial Times kanë ngritur alarmin e NATO-s për kufizimet e vendeve evropiane në përgjigjen ndaj sulmeve të mundshme raketore: sipas Aleancës, anëtarët e NATO-s kanë aktualisht më pak se 5 për qind të aftësive të mbrojtjes ajrore të nevojshme për të mbrojtur krahun lindor nga një sulm në shkallë nga Rusia.

Burimi informacionit @BalkanWeb: Lexo me shume ne : Bota Sot News botasot.co