Detaje të reja kanë dalë në lidhje me megaoperacionin e SPAK, ku janë lëshuar disa urdhër arreste, ndërsa masë sigurie është dhënë edhe për Hajdar Bakon, i njohur si “Dari i Elbasanit”, i cili u arrestua dy muaj më parë në Dubai për plagosje të rëndë.

Por emri i Bakos del në dosjen “Plumbi i Artë”, ku i penduar i drejtësisë, Nuredin Dumani ka treguar disa vrasje. Për Hajdar Bakon, Dumani thotë se ai kishte porositur vrasjen e rivalëve të tij.

Nga dosja hetimore rezultonte se Dumani, ka dëshmuar se grupi i Erjon Alibej alias Agim Shurbi me pseudonimin “Krymi” dhe grupi i Hajdor Bakos alias (Çopja), i thirrur shkurtimisht “Dari”, janë vënë në garë për të eliminuar njëri-tjetrin.

Vetë Dumani atë kohë pranoi para SPAK se kishte mbajtur kontakte me dy grupet rivale në Elbasan, atë të Erjon Alibej dhe Hajdar Bakos.

“…Arjan Spahiu, që mbeti i vrarë në Belgjikë, ka qenë në listë për tu ekzekutuar nga vëllezërit Çopja, të cilët janë financuesit. Talo Çela, më ka thënë mua që nëse kryeja vrasjen e Arjan Spahisë, do më jepte 300 mijë euro…”, shprehej Dumani.

Megaoperacioni i SPAK

Mësohet se ky megaoperacion që ka nisur nga mbrëmja e djeshme (30 korrik) është vazhdim i operacioni “Plumbi i Artë” ku u vu në pranga Nuredin Dumani, dëshmitë e të cilit zbardhën disa vrasje kriminale.

Po ashtu nga ky operacion mësohet se janë zbardhur edhe disa vrasje në Elbasan, ndërsa janë lëshuar masë arrest shtëpie për ish gjyqtaren Pajtime Fetahu, zv.drejtorin e burgut të Bradasheshit, Martin Musaj dhe dy oficerë policie.

Deri tani raportohet se janë lëshuar mbi 30 urdhër arreste. Mësohet se në Elbasan janë mbi 10 persona që janë shpallur në kërkim dhe po punohet për kapjen e tyre.

Mësohet se në këtë operacion janë vënë në shënjestër për t’u arrestuar, personat me precedentë penal të akuzuar për vrasje, trafik droge dhe sigurim të kushteve për të kryer vrasje.

NDIQE LIVE “PANORAMA TV” © Panorama.al Burimi informacionit @Panorama.al: Lexo me shume ne :bota sot www.botasot.co