Katër persona, duke përfshirë edhe sulmuesin, u vranë në orët e vona të së shtunës, pasi një person hapi zjarr në një festë ditëlindjeje në një fshat në Francë, thanë autoritetet, raporton AFP.

Sulmuesi iu afrua shtëpisë ku një 20-vjeçar po festonte ditëlindjen me familjen e tij në Espinase-Vozelle. Ky fshat me rreth 1.000 banorë gjendet rreth 60 kilometra në veri të Klermont-Ferrand.

Ai hapi zjarrin ndaj personave që po merrnin pjesë në festë, duke vrarë tre prej tyre. Ai më pas vrau veten, thanë autoritetet lokale.

Në mesin e të vrarëve është i riu që po festonte ditëlindjen dhe babai i tij.

Policia ende po mbledh informacione për sulmin, thanë autoritetet.

Jerome Piques, një prokuror lokal, i tha AFP-së se burri, i cili nuk ishte në mesin e të ftuarve të festës, iu afrua shtëpisë fqinje përmes një shtegu që lidhte të dy pronat rreth orës 21:30 përpara se të qëllonte me armën e tij.

Katër persona u shtruan në spital pasi u plagosën nga të shtënat, por lëndimet e tyre nuk përbëjnë kërcënim për jetë, tha ai.

Pesëmbëdhjetë të tjerë, të cilët ishin dëshmitarë të të shtënave, janë duke u trajtuar nga psikologët.

“Është tronditëse”, i tha AFP-së Michel Marien, kryebashkiaku i Espinase-Vozelle. “Ne nuk e dimë se çfarë e shkaktoi këtë, se si një person humb kontrollin dhe bën diçka të tillë”.

Policia tha se sulmuesi, rreth të 50-tave, nuk kishte pasur precedent të mëparshëm penal.

Burimi informacionit @BalkanWeb: Lexo me shume ne : Bota Sot News botasot.co