Kryeministri holandez do të jetë Sekretari i Përgjithshëm i ri i Aleancës Atlantike. Kundërshtari i hidhur i Rusisë është një aleat i hekurt i SHBA-së. Ai gjithashtu është një armik i shpenzimeve të tepërta të qeverisë (por jo shpenzimeve të mbrojtjes)

Ai njihet si ‘kursimtari’. Në vendin e tij ai njihet si “Teflon Mark”, për aftësinë e tij për të mos u prekur kurrë nga skandalet, të cilat, si një tigan që nuk ngjit, nuk i ngjiten kurrë. Bëhet fjalë për kryeministrin holandez Mark Rutte, i cili po përgatitet të largohet nga udhëheqja e Holandës për të marrë një tjetër post shumë prestigjioz: atë të Sekretarit të Përgjithshëm të NATO-s.

Miratimi i aleatëve

Pasi janë kapërcyer armiqësitë e fundit, 32 anëtarët e Aleancës Atlantike kanë arritur unanimitet për emrin e tij si pasardhës i Jens Stoltenberg në largim, me njoftimin zyrtar që pritet të arrijë brenda pak ditësh dhe dorëzimin e planifikuar për në tetor, kur t´i skadojë mandati norvegjezit. Pasi ranë dy vetot e fundit, ajo e Hungarisë së Viktor Orbanit dhe ajo e Sllovakisë së Robert Ficos, edhe kundërshtari i tij i vetëm, presidenti rumun Klaus Iohannis, tërhoqi kandidaturën dhe deklaroi se do të mbështesë kolegun holandez. Për Rutte, me luftën në Ukrainë që nuk duket se do të përfundojë së shpejti dhe Lindja e Mesme më në flakë se kurrë, udhëheqja e Aleancës Atlantike do të jetë një sfidë e ndërlikuar.

Kundërshtari i Rusisë

Liberali 57-vjeçar ishte një nga ithtarët kryesorë të mbështetjes evropiane për Ukrainën në luftën kundër Rusisë së Vladimir Putinit. Qeveria holandeze i dha Kievit 2.63 miliardë euro ndihmë ushtarake dhe premtoi 2 miliardë të tjera për vitin 2024. “Ukraina duhet ta fitojë këtë betejë. Për sigurinë e saj dhe për tonën”, tha ai. Ish-udhëheqësi i VVD-së popullore, ‘Teflon Mark’ ishte ndër ata që ushtroi më shumë përpjekje që Kievi të furnizohej me avionë luftarakë F-16, një vendim i përshkruar nga Presidenti Volodymyr Zelenskiy si “historik”.

Kundërshtitë e Rutte ndaj Rusisë së Putinit datojnë në vitin 2014, kur një aeroplan u rrëzua mbi Ukrainë, një sulm për të cilin Amsterdami fajëson separatistët e mbështetur nga Moska, që la 298 njerëz të vdekur, përfshirë 196 holandezë. Lufta “nuk do të ndalet në Ukrainë nëse nuk e ndalim tani. Kjo luftë është më e madhe se vetë Ukraina. Kjo ka të bëjë me ruajtjen e sundimit ndërkombëtar të ligjit,” i tha ai Kombeve të Bashkuara në shtator 2022, shtatë muaj pas fillimit të pushtimit.

Aleat i SHBA

Ndër të parat që mbështetën kandidaturën e Rutte për të udhëhequr NATO-n ishin Shtetet e Bashkuara të Joe Biden, të cilave Sekretari i Përgjithshëm i ardhshëm i ka treguar vazhdimisht se ai është një aleat besnik. Dhe këtë e bëri edhe në dëm të ekonomisë së Holandës. Ashtu si kur ai pranoi të ndiqte Uashingtonin në kufizimin e shitjes së gjysmëpërçuesve të avancuar dhe pajisjeve për prodhimin e çipave në Kinë. Një vendim i tmerrshëm për biznesin e kompanisë holandeze Asml Holding NV, prodhuese e sistemeve më të avancuara të litografisë me çip në botë dhe e cila kishte 15% të xhiros së saj në gjigantin aziatik.

Dhe kur bëhet fjalë për Shtetet e Bashkuara, Rutte konsiderohet një burrë për të gjitha stinët. Disa e kanë cilësuar si “pëshpëritësin e Trumpit”, pëshpëritësin në vesh të Trump-it, për shkak të aftësisë së tij për të pasur marrëdhënie të shkëlqyera edhe me ish-presidentin grindavec që mund të rikthehet së shpejti në krye të SHBA-së.

Të kursyerit

Në Evropë, Rutte njihet për pozicionet e tij të ngurta në financat publike, ato të vendit të tij por edhe të vendeve të tjera anëtare, veçanërisht atyre mesdhetare si Italia. Papajtueshmëria e tij e bëri atë të bëhej lider i të ashtuquajturit grupi ‘kursues’, mbështetës të masave shtrënguese, madje duke mposhtur Gjermaninë. Një herë ai u shfaq në negociatat për buxhetin e BE-së me një biografi të Frédéric Chopin për të kaluar natën, sepse “çfarë ka për të bërë tjetër”, tha ai me përbuzje, duke e bërë të qartë se nuk do të lëshonte asnjë centimetër nga pozicioni i tij.

Kancelarja Angela Merkel gjithashtu thuhet se ishte e mërzitur nga sjellja e tij. Por në fakt në këtë mënyrë Rutte arriti t’i jepte Hollandës së vogël, një vendi me vetëm 17 milionë banorë, një rol më të madh se sa kishte në të kaluarën. Shpenzimet e vetme publike të tepërta që ai pranoi ishin në mbrojtje, e cila nën udhëheqjen e tij në Holandë tejkaloi objektivin prej 2% të përcaktuar nga NATO.

Një mënyrë jetese e thjeshtë

Dhe me këto poste ai arriti të ruante edhe konsensusin e popullsisë së tij, duke u bërë kryeministri që qëndroi më shumë në detyrë: 14 vjet. Gjatë pandemisë ai ishte ndër të fundit që vendosi masa kufizuese në Evropë, duke u mbështetur fillimisht pothuajse ekskluzivisht në disiplinën e holandezëve.

Ata gjithashtu kanë pëlqyer gjithmonë stilin e jetesës së këtij burri 51-vjeçar, të pamartuar, i njohur për të shkuar në punë me biçikletë (ose duke ngarë një Saab të vjetër kur ai është me nxitim) dhe i cili gjithashtu zakonisht mbërrin në Këshillat Evropianë në Bruksel duke ecur nga hoteli, dhe jo në një makinë blu si gjithë të tjerët. Rutte bën pazare vetëm në supermarket dhe jeton në të njëjtën zonë të Hagës ku u rrit, në një shtëpi që e bleu me miqtë kur ishte student. Zakonet e një personi vërtet ‘kursues’, por që ndoshta do t’i duhet t’i braktisë si Sekretar i Përgjithshëm i NATO-s.

Burimi informacionit @BalkanWeb: Lexo me shume ne : Bota Sot News botasot.co