Partia DEM pro-kurde e Turqisë u bëri thirrje të martën (2 prill) autoriteteve që të anulojnë bllokimin e një prej kryebashkiakëve të saj që të merrte detyrën pas zgjedhjeve lokale dhe tha se po sfidonte rezultate të tjera për ata që i quajti “votuesit e paligjshëm” që e penguan atë për fitore. Sfidat nga DEM – partia e tretë më e madhe e Parlamentit, e cila performoi mirë në juglindjen kryesisht kurde – shënojnë mosmarrëveshjen më të madhe mbi rezultatet e votimit mbarëkombëtar vendor të së dielës, në të cilën partia e Presidentit Tajip Erdogan u mposht.

Abdullah Zeydan, kandidati i DEM-it në qytetin e Vanit, fitoi 55.5% të votave kundrejt 27.2% për kandidatin e AK Partisë (AKP) të Erdoganit. Megjithatë, DEM tha se Ministria e Drejtësisë kishte dërguar një letër pesë minuta përpara mbylljes së zyrave të premten javën e kaluar, dy ditë para votimit, duke kundërshtuar kandidaturën e Zeydan dhe një gjykatë më pas kishte vendosur se ai nuk kishte të drejtë të merrte postin. Një dokument nga bordi zgjedhor i Van, i parë nga Reuters, tregoi se fituesit të vendit të dytë të AKP-së do t’i jepej mandati për të qenë kryetar bashkie.

Ministria i referoi pyetjet mbi këtë çështje Bordit të Lartë Zgjedhor të vendit, i cili e referoi çështjen në zyrën e bordit zgjedhor në Van, ku askush nuk mund të kontaktohej menjëherë për koment.

“Banorët e Vanit demonstruan vullnetin e tyre në zgjedhje. Nuk ka alternativë tjetër veçse të respektohet dhe të merret parasysh kjo,” tha bashkëkryetari i DEM-it Tuncer Bakirhan në kryeqytetin Ankara, duke shtuar se votuesit do të qëndrojnë “kundër këtij grushti”.

Shteti turk ka goditur lëvizjen politike pro-kurde që nga rënia e një procesi paqeje në vitin 2015 për t’i dhënë fund një kryengritjeje dekadash, duke e akuzuar atë për lidhje me militantët kurdë.

Burimi informacionit @BalkanWeb: Lexo me shume ne : Bota Sot News botasot.co