Izraeli duhet të sqarojë rrethanat e vdekjes së shtatë personave që punonin për kuzhinierin e famshëm spanjoll-amerikan, Jose Andres, në një sulm ajror izraelit në Gazën qendrore, tha të martën kryeministri spanjoll Pedro Sanchez.

“Shpresoj dhe kërkoj që qeveria izraelite të sqarojë sa më shpejt të jetë e mundur rrethanat e këtij sulmi brutal që u ka marrë jetën shtatë punonjësve të ndihmës, të cilët nuk po bënin asgjë më shumë se sa të ndihmonin,” tha Sanchez pas vizitës në kampin palestinez për refugjatët, Jabal el-Hussein në Aman.

Punëtorët e vrarë po udhëtonin me dy makina të blinduara të World Central Kitchen kur kolona u godit të hënën teksa po dilte nga një magazinë pasi shkarkonte më shumë se 100 tonë ndihma ushqimore humanitare të sjellë në Gaza nga deti, tha agjencia.

“Është urgjente që Izraeli të lejojë aksesin në ndihma humanitare në Gaza, siç kërkohet nga organe të ndryshme ndërkombëtare, duke përfshirë Gjykatën Ndërkombëtare të Drejtësisë”, shtoi Sanchez, duke vënë në dukje se vendimet e GJND-së ishin të detyrueshme. Duke folur para udhëtimit të Sanchez, një burim i qeverisë spanjolle vlerësoi përpjekjet e bamirësisë spanjolle duke përdorur një korridor detar për të sjellë ndihma në Gaza, por tha se korridori nuk ishte i mjaftueshëm dhe kërkonte gjithashtu që të hapeshin korridoret e sigurta tokësore.

Më herët të martën, Sanchez tha në platformën e mesazheve sociale X se ishte “i tmerruar” nga vdekja e punëtorëve të WCK dhe e përshkroi “solidaritetin, altruizmin dhe përkushtimin e tyre ndaj atyre në nevojë” si një burim krenarie për qeverinë spanjolle. Sanchez po viziton Jordaninë, Katarin dhe Arabinë Saudite për të diskutuar konfliktin në Gaza dhe partneritetet e biznesit në rajon. Të hënën, Sanchez u tha gazetarëve që e shoqëronin në turne se Madridi do të njihte shtetësinë palestineze deri në korrik.

Burimi informacionit @BalkanWeb: Lexo me shume ne : Bota Sot News botasot.co