Partizani regjistroi triumfin e tretë radhazi në kampionat përballë Kukësit (3-1), duke ngushtuar diferencën me Tiranën kryesuese në vetëm dy pikë. Skuadra e Giovanni Colellas ka zhvilluar një sezon me ulje dhe ngritje.
Megjithatë, “Demat” mesa duket e kanë gjetur rrugën e duhur dhe në katër sfida e mbetura do të luajnë gjithçka për të fituar titullin kampion.
Sfida tjetër është më e forta, bukura dhe më e rëndësishmja: kundër Tiranës. Derbi i kryeqytetit do të vendosë shumë për fatet e kampionatit.
Një fitore e Partizanit do të ngjiste të kuqtë në krye, ndërsa triumfi i bardhebluve do të rikthente diferencën prej pesë pikësh.
Me skuadrën e Shehit që do të ishte shumë pranë mbrojtjes së titullit, ndërsa barazimi do të mbante garën të hapur deri në javën e fundit.
Për Partizanin fitorja me Kukësin ishte e pesta radhazi në shtëpi, duke përfshirë edhe suksesin në takimin e Kupës me Vllazninë.
“Arena e Demave” është kthyer në një fortesë për të kuqtë e kryeqytetit. Që nuk njohin rezultat tjetër përveçse fitores në këtë stadium që prej 6 shkurtit.
Në fundin e kampionatit, Partizani mesa duket ka gjetur edhe golashënuesin. Victor Da Silva shënoi dy herë në sfidën përballë Kukësit.
Braziliani është ngjitur në kuotën e 10 golave duke barazuar Xhuljano Skukën. 28-vjeçari latin po kalon një moment shumë të mirë.
Në katër ndeshjet e fundit e ka gjetur rrjetën rregullisht. Trajneri Colella shpreson që braziliani do të vijojë të shënojë sërish në takimet e mbetura me synimin për të rikthyer titullin kampion që mungon prej vitit 2019.
