E ardhmja e Amir Rrahamanit është te Napoli. Këtë gjë e konfirmon edhe udhëtimi i agjentit të mbrojtësit shqiptar, Ardian Aliaj, i cili ndodhet në Napoli për të mbyllur edhe detajet e fundit të marrëveshjes.
Palët janë shumë pranë marrëveshjes përfundimtare për të hedhur më pas firmën në kontratë. Amir Rrahmani pritet të rinovojë kontratën e tij me Napolin edhe për pesë sezone të tjera.
Sa i përket pagës, ajo do të jetë progresive pas çdo sezoni. Fillimisht mbrojtësi që përfaqëson Kombëtaren e Kosovës do të përfitojë 2.6 milionë euro. Më pas në sezonin e radhës, 2.7 milionë euro, deri sa paga e tij të shkojë në 2.9 milionë euro.
Një konfirmim i rëndësishëm ky për Amir Rrahamanin që është kthyer në një titullar të padiskutueshëm për skuadrën e Spallettit dhe është një lojtar kyç në këtë sezon fantastik që janë duke kaluar. Ditë e rëndësishme për mbrojtësin, pasi nga momenti në moment pritet të vijë edhe zyrtarizimi.
Në këto momente agjenti i lojtarit, Ardian Aliaj është në zyrat e klubit Napoletan për të mbyllur marrëveshjen mes palëve.
