Në fakt, po kalojnë nga bota e nëndheshme në dritë, me të njëjtën metodë, pa letra dhe pa sportele.
Për 3 vite rresht ato kanë qenë aty, nëpër sallone të kamufluara, dhe në xhep të pantallonave, në telefon. Dhe kjo rezultoi një marrëzi e re, e madhe sa ajo që mori fund në vitin 2019, ku në mijëra dyqane, ngjitur pas çdo pallati a lagjeje vendoseshin shuma nga 100 lekë deri në 200 mijë lekë për skedinë. Por, si po vijnë ato sërish? Kush këmbënguli dhe bindi të njëjtën qeveri që i dha fund bixhozit masiv, t’i rikthejë sërish në dritë. Peticionin e dërgoi në qeveri, Komiteti Olimpik dhe Federatat Sportive.
“Propozimi ynë përfshin transparencë fiskale totale, baste online të rregulluara me ligj. Operatorë ekonomikë të certifikuar dhe përfshirjen e operatorëve globalë seriozë, si dhe vendosjen e limitit të moshës apo një kufiri monetar maksimal,” – thuhej në peticion.
Për ta përforcuar këtë argument, Komiteti Olimpik dhe Federatat Shqiptare të Sportit thonë se të mirat e ligjërimit të lotove të sportit po i sheh prej vitesh edhe perëndimi.
“Ato nuk mund të mbyllen përgjithmonë, pasi gjithë bota e qytetëruar bastet i ka. I kanë të gjitha vendet europiane ku duam të shkojmë ne, por ato kërkojnë një kontroll dhe ne nuk jemi më për sallone të basteve ku rrinë të rinjtë me orë të tëra parazitë,” – deklaroi Fidel Ylli, president i Komitetit Olimpik Shqiptar.
SI IA DOLI MAFIA E BIXHOZIT TË NËNSHTRONTE SHTETIN?
Vetëm 2 vite pas rregullimeve në ligjin e lojërave të fatit në 2015, fenomeni i bixhozit, ia doli të bëhej një industri fitimprurëse me xhiro vjetore 130 mln euro. Nga këto pjesa më e madhe rridhte nga kazinotë, dhe pas tyre vinin bastet sportive. Por, kjo ishte vetëm pjesa e deklaruar, pasi të ardhurat e grumbulluara nga bota e krimit mendohet se arritën në 800 mln euro në vit.
Ato fitoheshin e investoheshin si para të pistë për t’u dhënë fuqi një grushti njerëzish të cilët nuk ishin as më shumë, e as më pak se organizata kriminale që i bënin karshillëk shtetit dhe biznesit të ndershëm. Vetëm nga bastet sportive në vitin 2017, të ardhurat ishin 44.5 milionë euro, dhe në vitin e fundit të ekzistencës, 37.4 milionë euro. Me këto të ardhura, buxheti siguronte nga ky sektor, rreth 15 mln euro çdo vit.
Taksa e basteve të sportive u zerua pas vitit 2018, dhe kontribut në buxhet sollën vetëm kazinotë dhe lotaritë kombëtare, përkatësisht 6 mln euro në 2020-në dhe 12.8 mln në vitin 2021.
