Viti 2022 i Real Madridit përfundoi nën frenim, me vetëm dy fitore në pesë ndeshjet e fundit zyrtare. Megjithatë, viti kalendarik që përfundoi shumë përpara për t’i lënë vend Kupës së Botës në Katar do të shkojë në arkiv si një nga më të lumturit në historinë e fundit të “Los Blancos” dhe në veçanti të Carlo Ancelotti.
Trajneri emilian ishte në gjendje të shkruante histori, duke u bërë trajneri i parë i aftë për të fituar katër edicione të Ligës së Kampionëve, i 14-ti në historinë e Realit. Ai ishte i pari i aftë për të triumfuar në 5 kampionate të ndryshme evropiane, për të përmendur disa nga të dhënat pikante të tij. Duke folur në “Che tempo che fa”, në “Rai Tre”, Ancelotti bëri një bilanc jo vetëm të një viti e gjysmë të përvojës së tij në stolin e Real Madridit, por edhe të karrierës legjendare si trajner, duke njoftuar se lamtumira nga stoli është ende larg:
“Për momentin të qenit gjysh nuk më intereson, prapëseprapë më pëlqen shumë puna që bëj, edhe nëse para ndeshjes ndjej gjithmonë një gjendje shqetësimi fizik, me rritje djersitjeje dhe rrahje të zemrës. Kam drejtuar 1200 ndeshje dhe më ndodh çdo herë, por më pas kur fillon loja, gjithçka kalon. Një herë e një kohë të paktën mund të gëzoheshe nëse skuadra jote do të shënonte, tani duhet të presësh kontrollin e VAR…”
Pastaj një shaka për cilësinë e tij si poliglot: “Unë i flas të gjitha gjuhët, përveç gjermanishtes, nuk mund ta bëja këtë. E kam harruar menjëherë… Flas mirë anglisht dhe spanjisht, frëngjisht mjaft mirë…”
Ndër momentet më të shijshme të intervistës ishte Zlatan Ibrahimovic, i cili donte ta përshëndeste Ancelottin, trajnerin e tij te PSG për një sezon, në vitet 2012-2013, përmes një videoje të regjistruar plot komplimente dhe falënderime, gjatë së cilës trajneri nuk mundi ta frenonte emocionin e tij: “Përshëndetje Carlo, urime për atë që bëre dhe për atë që fitove.
Ti je numri 1, kam qenë shumë me fat që të kam pasur trajner. Duhet të mburresh edhe ti si trajner që me kë trajnuar mua (qesh). Megjithatë, fati kryesor ishte që njoha personin që ti je dhe për këtë të them që si njeri je edhe më i mirë se si trajner. Të dua, por mos më thuaj më që je jo i pasur dhe se duhet të të jap disa para hua, se tani edhe ti je në gjendje të mirë…”
“Pas kësaj maske të arrogantit qëndron një profesionist i madh dhe një altruist i madh, – ishte përgjigja e Ancelottit në studion e Fabio Fazios. – Zlatan ishte një nga të paktët lojtarë që kam trajnuar dhe që kishte më shumë kënaqësi të bënte një asist sesa të shënonte një gol në Paris. Ai është një lojtar i madh, me karakter të jashtëzakonshëm”.
