Presidenti i KOKSH, Fidel Ylli, në emisionin “SportZone”, foli për debatet në Asamblenë e 28 majit. Ai deklaroi se FSHF, mori pjesë me avokatin Envi Hicka, por duhet të paguanin kuotat, diçka që sipas tij, federata e futbollit nuk e ka bërë prej 5 vitesh.
Sipas Yllit, FSHF nuk duhej të lejohej në Asamble pa paguar kuotat, por e mori ai riskun për këtë, ndërsa shtoi se e ndërpreu Hickën në fjalën e tij, pasi po fliste gjëra të pavërteta.
“Në Asamblenë e KOKSH, nuk është se kishte replika, ishin debate që ishin konsumuar muaj më përpara. FSHF na tha se do të marrë pjesë në Asamble, ku do të marrin pjesë presidenti Armand Duka dhe avokati Envi Hicka.
Në të njëjtën kohë, FSHF nuk kthente përgjigje, kur ne i thoshim që kanë sjellë një aplikim, dhe duhet të bënin disa dokumente që janë në procedurë për t’u bërë. FSHF ka 5 vite që nuk paguan kuotat dhe ka një pikë, që një Federatë që nuk paguan kuotat, humb të drejtën që të jetë pjesë e KOKSH.
Avokatit Hicka, i thashë që mund të marrë pjesë dhe e mora vetë riskun, në një kohë që nuk duhet ta lejonin që te dera. Hicka, foli budallallëqe dhe të pavërteta. E lamë të flasë, por po fliste broçkulla. Nuk mund të gënjente Asamblenë. Tha që CAS-in, e kemi bërë me një nivel, ndërkohë që është me dy nivele. Kishte ardhur i papërgatitur. Shkel rregullat që ka vendosur Asambleja dhe vjen aty e na jep mend.
Futbolli është një federatë si të gjitha të tjerat. Nuk i mat me peshë specifike. Nëse futbolli nuk respekton rregullat e vendosura nga Asambleja, nuk do të marrë pjesë aty. Avokati kishte qëllim të prishte Asamblenë. Futbolli të respektojë rregullat dhe do të marri pjesë aty. Duka nëse nuk respekton rregullat, nuk e lejon njeri në UEFA”, u shpreh Fidel Ylli.
